మడకశిర: జనసేన పార్టీ హిందూపురం పార్లమెంట్ నిర్వాహక దళంలో మడకశిరకు చెందిన పార్టీ సీనియర్ నాయకుడు వెంకటేష్ గుప్తాకు చోటు లభించింది. స్థానిక సంస్థల ఎన్నికలను దృష్టిలో ఉంచుకుని జనసేన పార్టీ అధిష్ఠానం హిందూపురం పార్లమెంట్ పరిధిలో 32 మంది సభ్యులతో నిర్వాహక దళాన్ని ఏర్పాటు చేసింది. ఈ దళంలో వెంకటేష్ గుప్తాను సభ్యుడిగా నియమించింది.
ఈ సందర్భంగా తనపై నమ్మకం ఉంచి నిర్వాహక దళంలో సభ్యుడిగా అవకాశం కల్పించిన జనసేన పార్టీ అధినేత, రాష్ట్ర ఉప ముఖ్యమంత్రి పవన్ కళ్యాణ్‌కు వెంకటేష్ గుప్తా ప్రత్యేక కృతజ్ఞతలు తెలిపారు. అలాగే పార్లమెంట్ సమన్వయకర్తలు చిలక మధుసూదన రెడ్డి, నవీన్ నిశ్చల్, అమర్ కార్తికేయలకు ధన్యవాదాలు తెలియజేశారు.
పార్టీ అధిష్ఠానం తనకు అప్పగించిన బాధ్యతలను సమర్థవంతంగా నిర్వర్తిస్తానని వెంకటేష్ గుప్తా పేర్కొన్నారు. జనసేన పార్టీ బలోపేతానికి తన వంతు కృషి చేస్తానని తెలిపారు. స్థానిక సంస్థల ఎన్నికల నేపథ్యంలో పార్టీ నాయకత్వం చేపడుతున్న ఈ నియామకాలు హిందూపురం పార్లమెంట్ పరిధిలో పార్టీ కార్యకలాపాల సమన్వయానికి దోహదపడనున్నాయి.
