అనకాపల్లి జిల్లా: అనకాపల్లి జిల్లా బుచ్చయ్యపేట పోలీస్ స్టేషన్ పరిధిలోని వడ్డాది వద్ద గంజాయి అక్రమ రవాణాపై పోలీసులు దాడి చేశారు. వాహన తనిఖీలు నిర్వహిస్తున్న సమయంలో ద్విచక్ర వాహనంపై గంజాయిని అక్రమంగా తరలిస్తున్న వ్యక్తిని పట్టుకుని, అతని వద్ద నుంచి సుమారు 8 కిలోల గంజాయిని స్వాధీనం చేసుకున్నారు. స్వాధీనం చేసుకున్న గంజాయి విలువ సుమారు రూ.1.50 లక్షలుగా పోలీసులు అంచనా వేశారు.
పోలీసులు తెలిపిన వివరాల ప్రకారం.. అల్లూరి సీతారామరాజు జిల్లా జి.మాడుగుల మండలం బీరం పంచాయతీకి చెందిన పొండే నాగరాజు గంజాయిని అక్రమంగా తరలిస్తున్నట్లు గుర్తించారు. జి.మాడుగుల ప్రాంతం నుంచి చోడవరం వైపు గంజాయిని తీసుకెళ్తుండగా వడ్డాది వద్ద పోలీసుల తనిఖీల్లో పట్టుబడ్డాడు. గంజాయి రవాణాకు ఉపయోగించిన ద్విచక్ర వాహనాన్ని కూడా పోలీసులు స్వాధీనం చేసుకున్నారు.
ఈ ఘటనపై బుచ్చయ్యపేట పోలీసులు కేసు నమోదు చేశారు. గంజాయి ఎక్కడి నుంచి తీసుకొస్తున్నారు, ఎవరికి సరఫరా చేయడానికి తరలిస్తున్నారు, ఈ అక్రమ రవాణా వెనుక మరెవరైనా ఉన్నారా అనే కోణాల్లో తదుపరి దర్యాప్తు కొనసాగిస్తున్నారు.
గంజాయి అక్రమ రవాణా, విక్రయాలపై నిరంతరం నిఘా ఉంచామని పోలీసులు తెలిపారు. చట్టవిరుద్ధ కార్యకలాపాలకు పాల్పడితే కఠిన చర్యలు తీసుకుంటామని హెచ్చరించారు.
– పి. మనోజ్ కుమార్, ఎస్ఐ, బుచ్చయ్యపేట పోలీస్ స్టేషన్
