విశాఖపట్నం: విశాఖ నగరంలో డ్రగ్స్ కలకలం రేపింది. డ్రగ్స్ విక్రయించేందుకు నగరంలోకి వచ్చినట్లు అనుమానిస్తున్న ముగ్గురు వ్యక్తులను టాస్క్‌ఫోర్స్ పోలీసులు అరెస్ట్ చేశారు. వారి వద్ద నుంచి 50 గ్రాముల MDMA, ఒక లీటర్ లిక్విడ్ గంజాయిను స్వాధీనం చేసుకున్నట్లు సమాచారం.
పోలీసుల వివరాల ప్రకారం.. గాజువాక ప్రాంతం నుంచి డ్రగ్స్ విక్రయించేందుకు ఓ ముఠా నగరంలోకి వచ్చినట్లు టాస్క్‌ఫోర్స్ పోలీసులకు సమాచారం అందింది. దీంతో అప్రమత్తమైన పోలీసులు ఈస్ట్ పాయింట్ కాలనీలో నిఘా ఏర్పాటు చేశారు. అనుమానితుల కదలికలను గమనించిన టాస్క్‌ఫోర్స్ పోలీసులు వారిని అదుపులోకి తీసుకున్నారు.
అనంతరం వారి వద్ద తనిఖీలు నిర్వహించగా 50 గ్రాముల MDMAతో పాటు ఒక లీటర్ లిక్విడ్ గంజాయి లభించినట్లు పోలీసులు తెలిపారు. డ్రగ్స్‌ను స్వాధీనం చేసుకుని ముగ్గురిని అరెస్ట్ చేశారు.
అరెస్ట్ చేసిన నిందితులను తదుపరి విచారణ నిమిత్తం త్రీ టౌన్ పోలీసులకు అప్పగించినట్లు సమాచారం. ప్రస్తుతం త్రీ టౌన్ పోలీసులు నిందితులను విచారిస్తున్నారు. నగరంలో డ్రగ్స్ సరఫరా వెనుక ఎవరెవరు ఉన్నారు? వీరికి డ్రగ్స్ ఎక్కడి నుంచి అందుతున్నాయి? అనే కోణాల్లో పోలీసులు దర్యాప్తు చేస్తున్నారు.
డ్రగ్స్ ముఠాకు సంబంధించిన లింకులపై పోలీసులు ప్రత్యేకంగా దృష్టి సారించినట్లు తెలుస్తోంది. నిందితుల విచారణలో మరిన్ని వివరాలు వెలుగులోకి వచ్చే అవకాశం ఉంది.
