అడ్డగోలుగా ఫుట్‌పాత్‌లపై దుకాణాలు.. పేదల పేరుతో అద్దె వసూళ్ల ఆరోపణలు
ఆర్కే బీచ్ పరిసరాల్లో అక్రమ దుకాణాలపై విమర్శలు
విశాఖపట్నం: విశాఖ ఆర్కే బీచ్ పరిసరాల్లో ఫుట్‌పాత్‌ల ఆక్రమణలు, అనధికారికంగా ఏర్పాటు చేస్తున్న దుకాణాలపై విమర్శలు వెల్లువెత్తుతున్నాయి. పేదలు చిన్నచిన్న వ్యాపారాలు చేసుకుని ఉపాధి పొందేందుకు ప్రభుత్వం కల్పించిన అవకాశాలను కొందరు దుర్వినియోగం చేస్తున్నారనే ఆరోపణలు వినిపిస్తున్నాయి.
తోపుడు బండ్లు, చక్రాల బల్లలు వంటి వాటిపై చిన్న వ్యాపారాలకు అనుమతులు ఉన్నప్పటికీ.. వాటి పేరుతో పెద్దస్థాయిలో దుకాణాలు ఏర్పాటు చేసి వ్యాపారాలు సాగిస్తున్నారని స్థానికులు ఆరోపిస్తున్నారు.
పాండురంగాపురం వద్ద భారీ పాన్ షాప్
పాండురంగాపురం ప్రాంతంలో వైజాగ్ గెస్ట్ హౌస్ ఎదురుగా ఫుట్‌పాత్‌పై కొనసాగుతున్న ఓ పాన్ షాప్‌పై స్థానికులు అభ్యంతరం వ్యక్తం చేస్తున్నారు. పాన్ షాప్ పేరుతో రోడ్డుపైనే రెండు పెద్ద ఫ్రిడ్జ్‌లు ఏర్పాటు చేయడంతో ప్రజలు, వాహనదారులకు ఇబ్బందులు ఎదురవుతున్నాయని చెబుతున్నారు.
రాత్రి 10 గంటల తర్వాత ఈ ప్రాంతంలో కొందరు వ్యక్తులు గుమిగూడుతున్నారని, గుట్కా, ఖైనీ వంటి పొగాకు ఉత్పత్తుల వినియోగంతో పాటు అసభ్యకర ప్రవర్తన జరుగుతోందని స్థానికుల ఆరోపణ. రోడ్డుపై వాహనాలు నిలిపివేయడం వల్ల ట్రాఫిక్ అంతరాయం ఏర్పడటంతో పాటు ప్రమాదాల ప్రమాదం కూడా ఉందని వారు అంటున్నారు.
కార్పొరేషన్ స్థలానికి అద్దె?
ఈ తరహా దుకాణాల విషయంలో మరో కీలకమైన ఆరోపణ తెరపైకి వస్తోంది. ఒకరి పేరుతో లేదా ఒకరి ఆధీనంలో ఉన్న దుకాణాలను మరొకరు అద్దెకు తీసుకుని వ్యాపారం చేస్తున్నారనే విమర్శలు ఉన్నాయి.
