న్యూఢిల్లీ: జంతర్ మంతర్ వద్ద జరిగిన నిరసన సందర్భంగా మహిళా జర్నలిస్టులతో పోలీసు అధికారులు దురుసుగా ప్రవర్తించారన్న ఆరోపణల నేపథ్యంలో ఢిల్లీ పోలీస్ విభాగంలో కీలక పరిణామం చోటుచేసుకుంది. ఆరోపణలు ఎదుర్కొంటున్న ఢిల్లీ పోలీస్ ACP వివేక్ భగత్‌కు అడిషనల్ DCP స్థాయి ప్రస్తుత డ్యూటీ ఛార్జ్ అప్పగించారు.
అక్టోబర్ 3న జంతర్ మంతర్ వద్ద చీఫ్ ఎలక్షన్ కమిషనర్ జ్ఞానేశ్ కుమార్‌కు వ్యతిరేకంగా జరిగిన నిరసనను కవర్ చేస్తున్న సమయంలో పోలీసు అధికారులపై ముగ్గురు మహిళా జర్నలిస్టులు లైంగిక వేధింపులు, దురుసు ప్రవర్తనకు సంబంధించిన ఆరోపణలు చేశారు. ఈ ఫిర్యాదులను ఢిల్లీ పోలీసులు క్రైమ్ బ్రాంచ్‌కు దర్యాప్తు కోసం బదిలీ చేశారు.
ఈ ఆరోపణల నేపథ్యంలోనే ACP వివేక్ భగత్‌కు Additional DCP ఛార్జ్ రావడం చర్చకు దారితీసింది. అయితే పోలీసు అధికారుల వివరణ ప్రకారం.. ఈ ప్రమోషన్ ప్రక్రియ ఆరోపణలు వెలువడకముందే ప్రారంభమైందని, ఇది సాధారణ ప్రక్రియలో భాగమని తెలిపారు.
అధికారిక ఉత్తర్వుల ప్రకారం భగత్‌తో పాటు మొత్తం 12 మంది Selection Grade DANIPS అధికారులకు Additional DCP పదవికి ప్రస్తుత డ్యూటీ ఛార్జ్ అప్పగించారు. ఈ ఏర్పాటు తాత్కాలికమని, కేంద్ర హోంశాఖ ద్వారా రెగ్యులర్ నియామకాలు జరిగే వరకు కొనసాగుతుందని ఉత్తర్వుల్లో పేర్కొన్నారు. ఈ తాత్కాలిక ఛార్జ్ వల్ల Additional DCP పదవికి సంబంధించిన అదనపు జీతం, సీనియారిటీ లేదా ఇతర ప్రయోజనాలు లభించవని కూడా స్పష్టం చేశారు.
అయితే ఆరోపణలపై దర్యాప్తు కొనసాగుతున్న సమయంలోనే అధికారికి ప్రమోషన్ రావడంపై సోషల్ మీడియాలో తీవ్ర చర్చ జరుగుతోంది. కొందరు దీనిని ప్రశ్నిస్తూ, దర్యాప్తు పూర్తయ్యే వరకు ఇలాంటి నిర్ణయాలను పునఃపరిశీలించాల్సిన అవసరం ఉందని వ్యాఖ్యానిస్తున్నారు. ఈ నేపథ్యంలో ఆరోపణలపై క్రైమ్ బ్రాంచ్ దర్యాప్తు ఎలా సాగుతుంది, తదుపరి ఎలాంటి చర్యలు ఉంటాయన్నది ఆసక్తికరంగా మారింది.
