రియాద్: సౌదీ అరేబియాలో ఉద్రిక్త పరిస్థితులు మరింత తీవ్రంగా మారాయి. యెమెన్‌కు చెందిన ఇరాన్ మద్దతుగల హౌతీ తిరుగుబాటు సంస్థ సౌదీ అరేబియాలోని పలు కీలక ప్రాంతాలపై క్షిపణులు, డ్రోన్లతో దాడులు చేసినట్లు ప్రకటించింది. సోమవారం రాత్రి సౌదీ రాజధాని రియాద్‌లో పేలుళ్ల శబ్దాలు వినిపించిన నేపథ్యంలో హౌతీల ప్రకటన ప్రాధాన్యం సంతరించుకుంది.
హౌతీ సైనిక ప్రతినిధి యాహ్యా సరీ ప్రకారం.. రియాద్‌లోని కింగ్ ఖాలిద్ అంతర్జాతీయ విమానాశ్రయం, రాబిగ్ ప్రాంతంలోని అరామ్‌కో రిఫైనరీ, దక్షిణ సౌదీలోని పలు సైనిక స్థావరాలు, విమానాశ్రయాలను లక్ష్యంగా చేసుకుని ఆపరేషన్లు చేపట్టినట్లు తెలిపారు. బాలిస్టిక్ క్షిపణులు, క్రూయిజ్ క్షిపణులు, డ్రోన్లను ఉపయోగించినట్లు హౌతీలు పేర్కొన్నారు.
హౌతీల వాదన ప్రకారం.. రియాద్ విమానాశ్రయంపై దాడి కారణంగా విమాన రాకపోకలకు అంతరాయం ఏర్పడింది. అలాగే అరామ్‌కోకు చెందిన చమురు కేంద్రాన్ని లక్ష్యంగా చేసుకున్నట్లు వారు తెలిపారు. అబ్హా విమానాశ్రయం, ఖమీస్ ముషైత్ సైనిక స్థావరం, నజ్రాన్, జిజాన్ ప్రాంతాల్లోని కీలక ప్రాంతాలను కూడా లక్ష్యంగా చేసుకున్నట్లు హౌతీలు ప్రకటించారు.
అయితే, ఈ దాడుల్లో జరిగిన నష్టం, ప్రాణనష్టం లేదా విమానాశ్రయానికి జరిగిన నష్టంపై సౌదీ అధికారుల నుంచి పూర్తిస్థాయి ధృవీకరణ అందలేదని తాజా నివేదికలు పేర్కొంటున్నాయి. అందువల్ల హౌతీల ప్రకటనలోని వివరాలను స్వతంత్రంగా ధృవీకరించాల్సి ఉంది.
యెమెన్‌లోనూ తీవ్ర దాడులు
ఈ పరిణామాల మధ్య సౌదీ నేతృత్వంలోని సంకీర్ణ దళాలు యెమెన్‌లో హౌతీల స్థావరాలపై దాడులు కొనసాగిస్తున్నాయి. రెడ్ సీ తీరంలోని హొడెయిడా ప్రాంతంలో ఆయుధ నిల్వ కేంద్రాలు, పేలుడు పదార్థాలతో కూడిన బోట్లను నిల్వ చేసే ప్రాంతాలు, నౌకా మైన్లకు సంబంధించిన స్థావరాలను లక్ష్యంగా చేసుకున్నట్లు సౌదీ సంకీర్ణ దళాలు తెలిపాయి.
యెమెన్‌లో సౌదీ మద్దతు ఉన్న ప్రభుత్వ బలగాలు కూడా హౌతీల ఆధీనంలోని ప్రాంతాలను తిరిగి స్వాధీనం చేసుకునేందుకు పెద్ద ఎత్తున సైనిక చర్యను ప్రారంభించాయి. బాబ్ అల్-మందబ్ జలసంధి చుట్టుపక్కల ప్రాంతాల్లో ప్రభుత్వ బలగాలు ముందుకు సాగుతున్నట్లు తెలుస్తోంది.
ఈ పరిణామాలతో సౌదీ అరేబియా–హౌతీల మధ్య ఘర్షణ మరోసారి తీవ్ర స్థాయికి చేరుకుంది. చమురు మౌలిక వసతులు, విమానాశ్రయాలు, సైనిక స్థావరాలపై దాడుల ముప్పు పెరగడం వల్ల ప్రాంతీయ భద్రతతో పాటు అంతర్జాతీయ చమురు సరఫరాలపై కూడా ఆందోళనలు వ్యక్తమవుతున్నాయి.
