అనకాపల్లి జిల్లా, చోడవరం:అనకాపల్లి జిల్లా చోడవరం నియోజకవర్గంలోని బుచ్చయ్యపేట మండలం వడ్డాది వద్ద ఘోర రోడ్డు ప్రమాదం చోటుచేసుకుంది. ఈ ప్రమాదంలో విజయరామరాజుపేట గ్రామానికి చెందిన ఆర్ఎంపీ డాక్టర్ దొడ్డి అమిత్ కుమార్ (40) మృతి చెందారు.
వడ్డాదిలో ఓ పేషెంట్‌కు వైద్యం అందించి స్వగ్రామానికి తిరిగి వెళ్తుండగా, మయూరి దాబా సమీపంలో రోడ్డు పక్కన ఆగి ఉన్న లారీని వెనుక నుంచి ఢీకొట్టారు. ఈ ప్రమాదంలో తలకు తీవ్ర గాయాలు కావడంతో అమిత్ కుమార్ అక్కడికక్కడే ప్రాణాలు కోల్పోయారు.
ఆర్ఎంపీగా స్థానిక ప్రజలకు వైద్య సేవలు అందిస్తూ అమిత్ కుమార్ మంచి గుర్తింపు పొందారు. అర్ధరాత్రి సైతం ఎవరైనా వైద్యం కోసం ఫోన్ చేస్తే వెంటనే స్పందించి సేవలందించేవారని స్థానికులు తెలిపారు. ఆయన మృతితో విజయరామరాజుపేట గ్రామంలో విషాదం నెలకొంది.
మృతుడికి భార్య, కుమార్తె, కుమారుడు ఉన్నారు. కుటుంబానికి పెద్ద దిక్కుగా ఉన్న ఆయన మరణంతో కుటుంబ సభ్యులు కన్నీరుమున్నీరవుతున్నారు. అమిత్ కుమార్‌ను కడసారి చూసేందుకు గ్రామస్థులు పెద్ద సంఖ్యలో తరలివచ్చారు.
ఈ ఘటనపై బుచ్చయ్యపేట ఎస్సై మనోజ్ కేసు నమోదు చేసి దర్యాప్తు చేస్తున్నారు.
