గుడివాడ: కృష్ణా జిల్లా గుడివాడ నియోజకవర్గంలో వైఎస్సార్‌సీపీలోకి చేరికలు జరిగాయి. ప్రముఖ వ్యాపారవేత్త బొప్పన రామచంద్రరావు (రాము) మాజీ మంత్రి, వైఎస్సార్‌సీపీ నేత కొడాలి నాని సమక్షంలో పార్టీలో చేరారు. ఆయనతో పాటు గుడ్లవల్లేరు మండలం పెంజండ్ర గ్రామానికి చెందిన పలువురు యువకులు వైఎస్సార్‌సీపీలో చేరారు.
ఈ సందర్భంగా కొడాలి నాని మాట్లాడుతూ.. రాష్ట్రంలో కూటమి ప్రభుత్వం అధికారంలోకి వచ్చిన తర్వాత రైతులతో పాటు అనేక వర్గాలను విస్మరించిందని ఆరోపించారు. బీజేపీ ఆశీస్సులతోనే తెలుగుదేశం, జనసేన పార్టీలు అధికారంలోకి వచ్చాయని ఆయన వ్యాఖ్యానించారు.
ప్రజలు ఎన్నుకున్న ప్రభుత్వంగా కాకుండా కేవలం కొన్ని వర్గాల ప్రయోజనాలకే పరిమితమై ప్రభుత్వం పనిచేస్తోందని కొడాలి నాని విమర్శించారు. ప్రభుత్వ విధానాలను ప్రశ్నించినా, విమర్శించినా అక్రమ కేసులు నమోదు చేస్తూ ప్రజలను భయభ్రాంతులకు గురిచేస్తున్నారని ఆరోపించారు.
రాబోయే స్థానిక సంస్థల ఎన్నికల్లో పోలీసుల బలం, అధికార బలాన్ని ఉపయోగించి గెలిచేందుకు కూటమి ప్రభుత్వం ప్రయత్నిస్తోందని కొడాలి నాని ఆరోపించారు. వైఎస్సార్‌సీపీలో చురుకుగా పనిచేసే నాయకులు, కార్యకర్తలపై కక్షసాధింపు రాజకీయాలకు పాల్పడుతూ వారిని ఆర్థికంగా ఇబ్బందులకు గురిచేస్తున్నారని అన్నారు.
ప్రజా సమస్యలపై పోరాడుతూ వైఎస్సార్‌సీపీకి అండగా నిలిచే ప్రతి ఒక్కరికీ పార్టీ అండగా ఉంటుందని ఆయన పేర్కొన్నారు. గుడివాడ నియోజకవర్గంలో పార్టీ బలోపేతానికి నాయకులు, కార్యకర్తలు సమష్టిగా పనిచేయాలని కొడాలి నాని పిలుపునిచ్చారు.
ప్రముఖ వ్యాపారవేత్త బొప్పన రామచంద్రరావు (రాము)తో పాటు పెంజండ్ర గ్రామ యువత వైఎస్సార్‌సీపీలో చేరడం పార్టీకి మరింత బలం చేకూరుస్తుందని స్థానిక పార్టీ నాయకులు పేర్కొన్నారు.
