విశాఖపట్నం, అక్టోబర్ 14: విశాఖపట్నం జిల్లా మధురవాడలోని చంద్రంపాలెం జాతరగట్టు శ్రీ దుర్గాలమ్మ అమ్మవారి ఆలయంలో దసరా శరన్నవరాత్రి ఉత్సవాలు ఘనంగా కొనసాగుతున్నాయి. ఉత్సవాల్లో భాగంగా నాలుగో రోజు బుధవారం అమ్మవారిని శ్రీ కాత్యాయనీ దేవిగా సర్వాంగ సుందరంగా అలంకరించి ప్రత్యేక పూజలు నిర్వహించారు.

ఈ సందర్భంగా అమ్మవారి విగ్రహానికి పంచామృతాలు, సుగంధ ద్రవ్యాలతో అభిషేకాలు, జలాభిషేకాలు నిర్వహించారు. అనంతరం కాత్యాయనీ దేవిగా అలంకరించిన అమ్మవారికి కుంకుమార్చనలు, బిళ్వదళాలతో పూజలు, సూర్య నమస్కారాలు, హోమం, నీరాజనం, మంత్రపుష్పం తదితర కార్యక్రమాలను ఆలయ అర్చకులు పట్నాల హరిప్రసాద్ శర్మ, పట్నాల మూర్తి శర్మల బృందం శాస్త్రోక్తంగా నిర్వహించింది.

అమ్మవారిని దర్శించుకునేందుకు వచ్చిన భక్తులు ప్రత్యేక పూజల్లో పాల్గొని తీర్థప్రసాదాలు స్వీకరించారు. చంద్రంపాలెం వాస్తవ్యులు మరుపిల్లి బుల్లిబాబు, రమణమ్మ దంపతుల కుమారులు ఆనంద్ దంపతులు, వెంకటరమణ దంపతుల సహకారంతో అమ్మవారికి కట్ట పొంగలి ప్రసాదాన్ని నివేదించి భక్తులకు పంపిణీ చేశారు.

ఈ కార్యక్రమంలో ఆలయ ధర్మకర్త పిళ్లా చంద్రశేఖర్, కమిటీ అధ్యక్షులు పిళ్లా సూరిబాబు, ఉపాధ్యక్షులు పిళ్లా పోతరాజు, పిళ్లా మోహన్ శివకృష్ణ, జనరల్ సెక్రటరీ నాగోతి తాతారావు, సెక్రటరీ పోతిన పైడిరాజు, కోశాధికారి పిళ్లా శ్రీనివాసరావు, ఉప కోశాధికారి దుక్క వరం, జాయింట్ సెక్రటరీ పోతిన ఉమామహేశ్వరరావు, పోతిన శివ, ఆర్గనైజింగ్ సెక్రటరీ గూడేల రాజు, పొట్నూరి హరికృష్ణ, బంక వాసు, మీడియా ఇన్‌చార్జి బోగవిల్లి రాము తదితరులు పాల్గొన్నారు.

అలాగే కమిటీ సభ్యులు, గ్రామ పెద్దలు, ముఖ్య సభ్యులు పాల్గొని అమ్మవారిని దర్శించుకున్నారు. దసరా శరన్నవరాత్రి ఉత్సవాల్లో భాగంగా ఆలయంలో ప్రతిరోజూ ప్రత్యేక అలంకరణలు, పూజా కార్యక్రమాలు నిర్వహిస్తున్నట్లు ఆలయ కమిటీ సభ్యులు తెలిపారు.