వాషింగ్టన్: రష్యాతో డీజిల్ ఒప్పందం విషయంలో అమెరికా అధ్యక్షుడు డొనాల్డ్ ట్రంప్‌కు సొంత దేశంలోనే వ్యతిరేకత వ్యక్తమవుతోంది. రష్యాతో కుదిరిన డీజిల్ ఒప్పందాన్ని రద్దు చేయాలని డిమాండ్ చేస్తూ రిపబ్లికన్, డెమొక్రటిక్ పార్టీలకు చెందిన 12 మంది సెనేటర్లు ట్రంప్‌కు లేఖ రాశారు. ఈ ఒప్పందం ఉక్రెయిన్‌కు నమ్మక ద్రోహం చేసినట్లేనని వారు తీవ్ర అభ్యంతరం వ్యక్తం చేశారు.
రష్యాతో డీజిల్ డీల్‌పై అభ్యంతరాలు
రష్యాతో డీజిల్ ఒప్పందం వల్ల అమెరికాలో ఇంధన ధరలు తగ్గుతాయనే హామీ లేదని సెనేటర్లు పేర్కొన్నారు. ఈ ఒప్పందం ద్వారా రష్యాకు ఆర్థికంగా ప్రయోజనం చేకూరితే, ఉక్రెయిన్‌తో కొనసాగుతున్న యుద్ధానికి అవసరమైన నిధులు సమకూర్చుకునేందుకు మాస్కోకు అవకాశం లభిస్తుందని ఆందోళన వ్యక్తం చేశారు.
ఉక్రెయిన్‌పై రష్యా యుద్ధం కొనసాగుతున్న సమయంలో ఆ దేశానికి ఆర్థిక ప్రయోజనాలు కల్పించే విధానాలను అమెరికా అనుసరించకూడదని వారు అభిప్రాయపడినట్లు సమాచారం. రష్యా డీజిల్‌ను స్వేచ్ఛగా విక్రయించేందుకు అవకాశం కల్పించడం వల్ల ఆ దేశ ఆదాయం పెరిగే ప్రమాదం ఉందని హెచ్చరించారు.
అమెరికా భద్రతకు ముప్పు ఉంటుందా?
రష్యాతో ఇంధన సంబంధిత ఒప్పందాల ప్రభావం కేవలం ఆర్థిక రంగానికే పరిమితం కాదని సెనేటర్లు పేర్కొన్నారు. రష్యాకు అదనపు ఆదాయం సమకూరడం అమెరికా భద్రతా ప్రయోజనాలపై ప్రభావం చూపవచ్చని ఆందోళన వ్యక్తం చేశారు. అందువల్ల ఈ ఒప్పందాన్ని పునఃసమీక్షించి, రద్దు చేసే దిశగా చర్యలు తీసుకోవాలని ట్రంప్ ప్రభుత్వాన్ని కోరారు.
రిపబ్లికన్, డెమొక్రటిక్ సెనేటర్లు ఒక్కటిగా..
సాధారణంగా పలు కీలక అంశాలపై భిన్న అభిప్రాయాలు వ్యక్తం చేసే రిపబ్లికన్, డెమొక్రటిక్ పార్టీలకు చెందిన సెనేటర్లు ఈ అంశంపై ఒకే అభిప్రాయంతో ముందుకు రావడం ప్రాధాన్యం సంతరించుకుంది. రష్యా–ఉక్రెయిన్ యుద్ధం నేపథ్యంలో మాస్కోపై ఆర్థిక ఒత్తిడిని కొనసాగించాలా? లేక ఇంధన అవసరాల కోసం ఒప్పందాలకు అవకాశం ఇవ్వాలా? అనే అంశంపై అమెరికా రాజకీయాల్లో చర్చకు ఈ పరిణామం దారితీసింది.
